لو عايز ترسم.. 4 شباب هيعلموك من طقطق لسلامو عليكو
فن الرسم الواحد فيه بيطلق لخياله العنان، ولو عايز تتعلمه هتلاقي في الموضوع ده مجموعة من الشباب المحترفين اللي حبوا ينقلوا خبرتهم لكل اللي حابب يتعلم رسم.
حسام محمد
«حسام» خريج كلية هندسة قسم عمارة وبيحب يرسم المباني الأثرية وبيهتم جدًا بالتفاصيل في أثناء رسمه، سواء على الورق أو حتى على الزلط.
والتفاصيل حاجة لازم تاخد بالك منها وأنت بترسم لأنها هي اللي هتميز الرسمة بتاعتك لأن فيه فرق بين إن الرسمة تعدي على الناس مرور الكرام واالرسمة المتميزة اللي تشد العين.
«حسام» بينزل على صفحته فيديوهات لخطوات الرسمة بتاعته اللي هتعرف من خلالها إزاي بيرسم الرسمة بالتفاصيل الدقيقة دي وكمان بيعمل ورش. تقدر تتابع صفحته من هنا وتعرف امتى الورشة الجاية.
آية هاني
رسم ثري دي، ورسم بالأكل، ونحت، ورسم على البراميل، ورسم بالصلصال، ورسم على الأحذية، ورسم بالألوان، ورسم بالرصاص، كل دي أنواع رسم برعت فيها آية هاني الطالبة بكلية تربية فنية اللي قدرت تسيب بصمة متميزة في كل رسمة بتعملها.
وخبرة «أية» في الرسم جت من خلال الطرق اللي حبت تنقلها لكل اللي حابب يرسم من خلال فيديوهات بتنزلها على صفحتها من هنا لخطوات الرسمة اللي بترسمها ولو عندك أي سؤال تقدر تسألها.
مصطفى سعدي
أما «مصطفى» فهو رسام مقيم في تركيا وابتدى في مجال الرسم من خلال رسم رسومات بسيطة وبعدين طور نفسه من خلال التمرينات اليومية وتصحيح الأخطاء اللي وقع فيها وبعد كده مارس الرسم بشكل مكثف لغاية ما وصل لمستوى احترافي.
وحب «مصطفى» يقتصر الرحلة اللي هيمر بيها أي مبتديء في مجال الرسم وقرر إنه يعمل موقع لتعليم الرسم من طقطق لسلامو عليكوا، بحيث ينقل خبرته اللي سبق ومر بيها. اضغط على الصورة وادخل الموقع.
عبد الله الدسوقي
«الدسوقي» ابتدى يرسم من 3 سنين كهواية واتعلم الرسم من خلال كتب فنون جميلة وفنون تطبيقية وتربية فنية وكتب الفن الأجنبية ورسم أكتر من 1000 رسمه علي مدار 3 سنين.
وابتكر مجموعة طرق سهلة لرسم البورتريه وحب إنه ينقل تجربته مع رسم البورتريه لكل اللي حابب يتعلم الرسم من خلال مشروع أطلق عليه «مشروع الألف رسام» اللي من خلاله سافر لعدة محافظات عشان يدي ورش ويعلم الناس. وتقدر تتابع صفحته من هنا وتعرف ميعاد الورشة الجاية امتى.
