رئيس التحرير أحمد متولي
 المراقبين في اللجنة أشكال وألوان.. إزاي تتعامل معاهم؟

المراقبين في اللجنة أشكال وألوان.. إزاي تتعامل معاهم؟

على مدار الدراسة في المدرسة والجامعة الواحد قابل أنواع مختلفة من المراقبين اللي كان بيقف قدامهم مش عارف إزاي يتعامل بحكم إنه خايف لو اتكلم المراقب يتعصب عليه ويعمل مشكلة.

بما إن امتحانات نص السنة خلاص على الأبواب، ولإن فيه طلاب كتير بيكونو مذاكرين كويس لكن مبيحلوش كويس في الامتحان بسبب التوتر والخوف من المراقب اللي في اللجنة هنوضح ليكو أنواع المراقبين في اللجنة وروشتة التعامل معاهم بدون مشاكل.

صرعة

ده اللي بيروح مصوت فجأة في نص اللجنة عشان يعني يصرع الطلبة ويخليهم يخافوا منه وده بيحصل في وسط ما مهما باصين في ورقتهم وفي ضغط عصبي عشان عايزين يلحقوا يحلوا.

مراقب يصرخ

لما تيجي تتعامل مع الشخص ده لازم يكون عندك ثبات انفعالي كبير بحيث تتحكم في انفعالات الغضب جواك تجاهه عشان لو اتنرفزت أو شتمت أو اتعصبت عليه بصوت عالي كل ده هيخليك تقع في مشكلة إنت في غنى عنها.

نضارة سودا

في مراقبين بتلاقيهم لابسين نضارة سودا مش مبينة عينيهم نهائي وقاعدين في نص اللجنة باصين في المطلق لا بيحركوا رقبتهم يمين ولا شمال وفي الغالب بيكونوا قاصدين عشان يشوفوا كل الطلبة بتعمل ايه وميخلوش الطلبة يعرفوا هما بيبصوا على ايه، عشان يعرفوا يقفشوا اللي بيغش.

انت بتكون مش عارف هو بيبصلك ولا بيبص لمين وكمان بتكون متعود انك تسرح في السقف عشان تفكر في اجابة السؤال ومش بتكون قاصد تعمل تمويه عشان تغش.

نظارة

وعشان تتعامل مع الشخصية ديه لازم متسرحش نهائي لا في السقف ولا في أي حتة في اللجنة وتخليك سارح في ورقتك بتفكر لأنه ممكن تقوم عليه الجنونة ويفتكرك بتغش وتلاقيه جاي عليك من غير تفاهم وساحب الورقة منك.

منبه

ده بقى المراقب اللي عامل زي المنبه بالظبط صحيح مش بيرن بس بيزن وبيتعرف من جملة باقي من زمن الإمتحان نص ساعة – باقي من زمن الإمتحان ربع ساعة.

المنبه

ده بقى تتعامل معاه ان ولا كأن حد قال حاجة وطمن نفسك بإنك عارف كده كده وقت امتحانك قد ايه وهتخلص في الوقت المحدد عشان ده هيبعد عنك التوتر والقلق اللي جاي من زن المراقب.

خالي اللتات

في مراقبين ميحلاش ليهم الكلام عن مشاكلهم في حياتهم ومين اتجوز ومين اطلق ومين هيكسب في الماتش إلا وهما في وسط اللجنة والطلبة بتمتحن ومش طايقة تسمع  دوشة حواليها.

ثرثار

دول بقى حلهم في التعامل معاهم انك تطلب منهم بشكل كويس انهم يوطوا صوتهم شوية عشان انت متوتر وعايز تحل وركز على الشكل الكويس ديه عشان لو قولتلهم مثلاً بزعيق - ما توطوا صوتكوا وترتوني -هيعتبروا انك بتهنهم فركز في انك تتكلم بأسلوب كويس معاهم.

رغدة جلال الدين

رغدة جلال الدين

صحفية مصرية تكتب في المجال الفني، إلى جانب كونها ممثلة ومغنية بفرقة «بهججة»